《老區大排檔風味的咖喱牛腩飯》
難得進入何文田愛民邨這懷舊的社區，我當然要幫襯下熟食冬菇亭，畢竟而家大集團同埋商場餐廳林立的香港，現在咁有風味同香港特色的大排檔已買少見少。
我哋揀咗呢間發記粉麵專家記的大排檔，雖然佢叫粉麵專家，但係我哋見到其他食客點佢的牛腩好靚好正咁，我哋清一色食佢嘅咖喱牛腩同清湯腩果然冇令人失望。
我點了佢嘅咖喱牛腩飯（$43連飲品），驟眼睇有啲似大快活嘅阿活咖喱牛腩，佢的咖哩唔係嗰啲求其用咖喱粉溝開黃色嘅「假」咖哩，而係上面有一層辣油，食得出有其他香料花椒八角辣椒粉等等唔同層次味道嗰種咖哩，同亞活咖哩有啲似但係味道冇咁濃烈，係我個人鍾意嘅口味。牛腩炆得夠腍同埋入味，仲會有啲牛筋，足料豐富😋但係薯仔就大舊相對唔係好夠入味，不過都相當送飯！正！
其他嘅嘢食都唔錯有一定嘅水準，而且大份又價錢實惠，否則都唔會屹立香港咁多年，不過眼見呢啲小本經營嘅有香港特色的傳統大排檔生意越嚟越難做，俾大集團壟斷市場，眼見逐間結業真的有點不捨，所以有機會都多啲幫襯呢啲小店，一來可以感受下香港傳統特色，二來當支持下小店都不錯啊！
店名：發記粉麵 (何文田)
環境：5/10
服務：7/10
價錢：8/10
食物質素： 8/10
整體：7/10
地點：何文田忠孝街60號愛民邨熟食亭地下3-4號舖
#吃貨玩樂
#咖哩牛腩飯
Search